[0]老鼠仔班班

 

[1]班班係一隻住喺樹林入面嘅老鼠仔，屋企有媽咪，仲有十七個兄弟姊妹。佢好犀利㗎，成日橫衝直撞，天不怕地不怕。

直到有一次，班班喺附近農場中咗陷阱，差啲甩唔到身，佢先開始識驚，唔敢四圍去農場度揾粟米食。

但冇嘢食個肚仔又會餓……佢問媽咪點算好，媽咪問返佢轉頭︰「你最叻係咩先？」

「挖地洞！我最叻就係挖地洞！」

 

[2]於是，佢每日就帶住太陽眼鏡、望遠鏡、放大鏡，仲有藥水膠布去挖地洞，想出去睇下其他地方有冇好嘢食。

 

[3]班班挖呀挖，挖呀挖，挖到唔知自己去咗邊，就諗住伸個頭出去睇下。估唔到頭一伸，就嚇咗一大跳！

前面有一隻好大嘅眼睛望住自己，佢心諗︰「死喇，俾人發現咗添！」

 

[4]「喂，老鼠仔，你邊度嚟㗎，叫咩名呀？」

班班眨一眨眼，發現講嘢嘅係一個巨人，佢笑住噉望住自己。

「我叫家明，係一個探險家，你呢？」

「唔使驚喎，我好鍾意動物㗎。」家明繼續講。

「真、真、真係？」班班有啲驚青。

「梗係冇呃你啦！」家明拍晒心口話。

「我叫班班……都係嚟探險㗎！」班班唔驚喇，仲好大聲噉答。

「噉就好喇！我啱啱揾到一條路，應該係通去啲好有趣嘅地方，你一唔一齊嚟呀？我可以保護你！」

 

[5]於是，班班跟住家明，大大方方上返路面行。佢哋穿過森林，經過河流，翻過山谷，去咗好多唔同嘅地方。班班對新嘢好有興趣，問咗家明好多問題。

「呢隻咩嚟㗎？」班班問。

 

[6]「呢隻係羚羊，佢頭上有角，唔止跳得遠，仲跑得好快添。」家明好細心噉答。

「羚羊先生你好，我叫班班……」但一句話都未講完，羚羊就跳走咗。

「嘩，真係好快呀！」班班大叫。

 

[7]佢哋繼續行。

「家明，你聞唔聞到，附近啲果實好香！」

班班四圍望，發現樹上面有好多果實，就好興奮噉問家明係咩嚟。

「呢啲係木橘，味道香甜，食咗可以幫助消化。」

佢哋眼甘甘望住啲木橘，好想食，但摘唔到……

呢個時候，有隻大馬騮爬咗上樹，摘咗兩個木橘，然後去到佢哋面前。

「家明，請你哋食啦。」大馬騮遞上木橘。

「哦，原來係葉猴伯伯！」家明大嗌。

「咦，今日有新朋友喎。」

「你好，我叫班班，多謝葉猴伯伯！」

「乖，你哋慢慢食……」

 

佢哋一路食一路傾，傾下傾下，食下食下，個天開始變黑，係時候返屋企喇。

班班返到屋企，將今日遇到巨人嘅事話咗畀媽咪聽。媽咪聽完都好驚訝呢個世界仲有好嘅巨人。

「我一開始都以為家明係設陷阱嗰啲壞人，但好彩唔係，我哋仲做咗好朋友添！」班班笑住噉話。

「我哋老鼠生存唔易，每一次出去揾食都係一場冒險。今次你嘅勇氣令你得到一份友誼，你要好好珍惜啊。」

就係噉，老鼠仔班班繼續小心翼翼噉接觸外面嘅世界，同時內心期待住下次再同家明一齊冒險……